Melbourne, 27 janar (topsporti.com) – Novak Djokovic është finalisti i dytë i turneut të madh të tenisit, Australian Open. Tenisti serb ia doli ta mposht në gjysmëfinale britanikun Andy Murray, pas një meçi maratonë, në të cilin u zhvilluan plot 5 sete.

Numri 1 në botë fitoi 3-2 në sete: 6-3, 3-6, 6-7, 6-1, 7-5. Djokovic ishte më i mirë në setin e parë, kurse atë të dytë e fitoi Murray.

Ky i fundit ia doli të ngadhënjejë edhe në setin e tretë, pas ‘tie-break’ 7-6, por në dy setet e fundit, ‘Nole’ u tregua më i vëmendshëm.

Ai e fitoi setin e katërt bindshëm 6-1, kurse në të pestin dhe atë vendimtar u desh të djersitej pak, për ta rrëmbyer atë 7-5 dhe për ta prerë biletën për finalen e së dielës, ku do të ketë punë me finalistin tjetër, Rafael Nadal, i cili dje e eliminoi Roger Federerin.