Babadimër, dërgona në EURO 2016!

Në një intervistë me të përditshmen sportive tiranase, Panorama Sport, trajneri i kombëtares shqiptare që së fundi ka renovuar kontratën e tij, Gianni De Biasi, ka thënë se Shqipërisë do t’i dhuronte një stadium modern po të ishte Babadimër! 

“Një stadium të vogël, por komod, ku do të ishin hapësirat e nevojshme brenda tij dhe jashtë. Palestra, dyqane të ndryshme ashtu që njerëzit do të frekuentonin atë edhe kur nuk ka ndeshje. Kombëtarja dhe tifozët do të ndiheshin rehat, derisa në çdo ndeshje ndërkombëtare do të ishte një panoramë se Shqipëria po i bën hapat e duhur për Europë,” ka thënë De Biasi në pyetjen e Panoramës se çka do t’i dhuronte Shqipërisë po të ishte Babadimër. 

Më tej ai është përgjigjur gjithashtu edhe për dëshirën e tij, se çka do t’i kërkonte Babadimrit. 

“Të na bëj të mundur që të provojmë emocionet e kualifikimit në EURO 2016,” ka qenë i shkurt strategu italian.