STINORI I RI
BIBL cakton datën për fillimin e edicionit 2019/20
22 July, 2019 @13:46
Edicioni 2019/20 i Ligës Ballkanike (BIBL) është përcaktuar të fillojë më datën 15 tetor 2019, ka bërë të ditur menaxhmenti i kësaj lige, përmes një njoftimi në faqen zyrtare të saj.
Përveç startit, BIBL ka bërë të ditur se do të ketë edhe ndërrim në sistemin e garës krahasuar me vitet e kaluara. .
Idea fillestare është që të jenë tetë ekipe që do të zhvillojnë ndeshjet në sistemin vajtje-ardhje. Katër ekipet më së miri të plasuara në fund të stinorit të rregullt, do të shkojnë në gjysmëfinale dhe fituesit e tyre do të luajnë finalen.
Stinori do të jetë gjashtë muaj i gjatë dhe pritet të përfundojë më 14 prill 2020 si datë më e largët.
E nëse bëhen më shumë se tetë ekipe që aplikojnë në garë, atëherë do të mendohet për sistemin e ri garues që mund të çojë në krijimin e dy grupeve për stinor të rregullt.
Deri më tani interes për sezonin e ri në BIBL kanë shprehur disa ekipe të Kosovës, por asnjëra s’ka konfirmuar zyrtarisht pjesëmarrjen, derisa faqja e BIBL ka bërë të ditur se vetëm Vllaznia e Shkodrës ka bërë kërkesë për pjesëmarrje deri tash.