FINALJA E KATEGORISË
Bylis, kampion i Kategorisë së Parë
24 May, 2019 @16:26
Është ekipi i Bylisit fituesi i kampionatit për Kategorinë e Parë, sezoni 2018-2019, pasi ka fituar me rezultatin 3-1 ndaj Vllaznisë, në finalen e kësaj kategorie të luajtur sot në orën 16:00.
Kjo finale mjaft e luftuar midis dy ekipeve fituese në dy grupet e Kategorisë së parë u zhvillua në stadiumin “Niko Dovana” të qytetit të Durrësit.
Golin e parë e gjeti ekipi i Vllaznisë me anë të futbollistit Ignat ’17 dhe pjesa e parë mbyllet me rezultatin 1-0 për shkodranët.
Pjesa e dytë ka folur për ekipin e Bylisit, i cili shënoi plot 3 herë.
Golin e barazimit për Bylisin e ka shënuar në minutën e 48-të Antoni, dhe më pas Bajramaj e Ujka në minutat 61 dhe 83 përkatësisht, i dhanë fitoren e kampionit ekipit të tyre.
Vllaznia e Shkodrës ka fituar Grupin A të Kategorisë së Parë duke tubuar 44 pikë dhe duke lënë prapa Erzenin. Ndërsa Bylis kishte përfunduar i pari në Grupin B të Kategorisë së Parë me 42 pikë, duke lënë pas Besën e Kavajës.
Të dyja finalistet edicionin e ardhshëm do të jenë pjesë e Kategorisë Superiore, ndërsa finalja u luajt për të regjistruar më të mirën e fituesve të grupeve dhe kampionin e Kategorisë së Parë.