Challandes parashikon muajin e ndeshjes Maqedonia V - Kosova

Selektori më i suksesshëm i Kosovës në historinë e shkurtër të vendit tonë në gara ndërkombëtare, Bernard Challandes, duke folë për Aargauer Zeitung ka bërë të ditur se po i mungon futbolli.

Ndër të tjera, ai sot do të duhej të analizonte rrjedhat e ndeshjeve mes Kosovës e Maqedonisë Veriore dhe potencialisht edhe ndaj Gjeorgjisë e Bjellorusisë - po të mos shpërthente coronavirusi.

Por pas epidemisë dhe pezullimit të të gjitha sporteve pothuajse në krejt globin, Challandes ka treguar se ka kohë për të përgatitur më mirë ekipin për PlayOff të Ligës D të Kombeve.

“Po merrem me organzimin dhe planifikimin e ndërprerjeve nga gjuajtjet e lira, kornerët. Tash kam më shumë kohë për të përgatitur ekipin për PlayOff,” ka thënë Challandes.

Sa i përket pyetjes së gazetës se kur mendon që do të luhet ndeshja, pasi që ajo tashmë u shtye dy herë për shkak të pandemisë, Challandes ka predikuar se ajo mund të zhvillohet në muajin nëntor të këtij viti.

“Supozoj se PlayOffin do ta luajmë në nëntor,” ka thënë zvicerani.

Maqedonia V - Kosova sipas kalendarit origjinal të ndeshjeve të UEFA-së është dashur të luhej më 26 mars 2020.

Pas valës së parë të pandemisë, ajo u shtye për datën 4 qershor 2020. E pas shtimit të rrezikut dhe shtyerjes së shumë datave, UEFA së fundi ka vendosur që kjo ndeshje të zhvillohet në një datë të lirë për të gjitha shtetet pjesëmarrëse në PlayOff - që kap muajin shtator deri në nëntor 2020.