NGA KONFERENCA
Challandes tregon çka i mungon Kosovës
16 November, 2019 @17:17
Selektori zviceran i Kosovës, Bernard Challandes, ka mbajtur konferencën e fundit për shtyp para ndeshjes Kosova-Anglia.
Challandes ka bërë të ditur se Kosova do të luaj futboll edhe në këtë ndeshje dhe do të tentojë më të mirën ndaj Anglisë, duke pasur parasysh natyrisht që rivalët janë ndër ekipet më të forta në botë.
Zvicerani ka treguar se Kosovës ndoshta as 13-14 lojtarë në fushë nuk do t’i dilnin ndaj Anglisë superiore, por sa i përket lojtarit të 12-të, ka thënë se i kanë ndër më të mirët në botë - Dardanët.
E krejt në fund, kur më u kryen pyetjet e gazetarëve, Challandes para se të çohej nga karrigia e vetë tha:
“E vetmja gjë që i mungon Kosovës - është një stadium si Wembley,” - me buzëqeshjen e tij karakteristike, dalëngadalë, duke i lënë në të qeshura dhe mendime të pranishmit në konferencë.