PEJA 95-99 PRIZRENI
Cole shkëlqen, Prizreni befason Pejën në çerek të fundit
10 November, 2019 @19:46
Skuadra e Pejës që dukej se shkonte drejt fitores që e priste sonte në Karagaç, është befasuar me lojën e mirë të Prizrenit në çerek të fundit, duke u mposhtur në fund 95-99.
Basketbollistët mysafirë kanë shkrirë epërsinë 4 pikëshe të Pejës, të arritur nga këta në çerek të parë (23-19), pasi që dy çerekët tjerë shkuan baraz (22-22 dhe 28-28) për tu rikthyer fuqishëm në çerek të fundit (22-30) dhe për të triumfuar ndaj verdhezinjëve.
Prizreni barazoi shpejtë në çerek të fundit përmes Mendrit Ademit 73-73 dhe brenda 2 minutave mori epërsinë e parë me pikët e Urim Zenelajt 74-75. Pastaj ekipi krijoi epërsinë me pikët e Elliott Cole e Bennet Holley për 76-82.
Peja riktheu epërsinë 84-82, por lufta e bardhezinjve nga qyteti i vjetër vazhdoi deri në fund për ta fituar ndeshjen me 5 pikë të shënuara radhazi nga Cole, treshet e tij dhe të Holleyt, për 89-94, për të hyrë qetë në minutën e fundit drejt fitores.
Më efikasi te Prizreni ka qenë Cole, që ka shënuar 32 pikë, ndërsa treshet e tij sonte kanë qenë vendimtare (5/8). Ai shtoi edhe 5 asistime në llogarinë e tij.
Ty Nicolas dha 18 pikë, ndërsa Urim Zenelaj dominoi nën kosh me double-double prej 12 pikëve e 14 kërcimeve.
Te Peja, e tërë pesëshja e parë shënoi pikë dyshifrore, derisa më efikasi ishte Henrik Sirko me 26 pikë, 8 kërcime e 7 asistime.
Me këtë fitore Prizreni ngritet për momentin në pozitë të tretë të klasifikimit me bilanc pozitiv 5-4, derisa Peja, që synonte arritjen e këtij bilanci sonte, iu bë e kundërta, 4-5.