FBK shtyen 2 xhirot e radhës në Superligë

Përmes një njoftimi të lëshuar sot në faqen zyrtare te Federatës, FBK ka bërë të ditur se ka shtyer dy xhirot e radhës së Superligës në basketboll, për shkak të përgatitjeve sa më të mira dhe izolimit të reprezentacionit të Kosovës para ndeshjeve kualifikuese për Botëror.

Në njoftimin e plotë është bërë e ditur se FBK nuk dëshiron të rrezikojë asnjërin nga basketbollistët për përballjet e radhës dhe se për këtë qëllim ata do të karantinohen për të qenë të gatshëm për përballjet ndaj Islandës e Sllovakisë që zhvillohen në fund të këtij muaji në Bratisllavë të Sllovakisë.

NJOFTIMI I PLOTË:

Federata e Basketbollit e Kosovës (FBK) ka vendosur që për shkak të dy ndeshjeve të Përfaqësueses së Kosovës në muajin nëntor në kuadër të Dritares së Dytë të parakualifikimeve evropiane për Kupën e Botës 2023, dy xhirot e radhës të Prince Caffe Superligës së Kosovës të shtyhen për më vonë.

Basketbollistët e Kosovës dhe shtabi teknik në krye me përzgjedhësin Christos Marmarinos do të jenë së bashku në një hotel në Prishtinë, që nga dita e mërkurë dhe do të stërviten në Marigona Residencë. Ata nuk do të kenë kontakte me familjet e tyre dhe bashkëlojtarët në klubet ku aktivizohen, pasi që Federata e Basketbollit të Kosovës nuk dëshiron që të rrezikojë që ndonjëri prej anëtarëve të delegacionit të infektohet me Covid-19.

Pra, shtyrja e dy xhirove është bërë për shkak që basketbollistët, të cilët janë pjesë e Përfaqësueses së Kosovës të karantinohen së bashku në mënyrë që të jenë të gatshëm në të gjitha aspektet për sfidat ndaj Sllovakisë dhe Islandës, që do të zhvillohen më 26 dhe 28 nëntor në Bratisllavë.

Basketbollistët e Kosovës të hënën janë testuar (PCR) në Institutin Kombëtar të Shëndetësisë Publike, derisa rezultatet do të dalin të martën. Po ashtu anëtarët e delegacionit të Kosovës do të testohen edhe një herë (më datë 21 nëntor) para se të udhëtojnë për në Bratisllavë.

TABELA AKTUALE E GRUPIT:

1. Kosova 2-0
2. Islanda 1-1
3. Sllovakia 1-1
4. Luksemburgu 0-2.