YLLI - PRISHTINA
Fitore në minutën e fundit, për kampionët vjeshtor
20 December, 2019 @22:34
Kampionia e Kosovës në basketboll, Prishtina, e mposhti Yllin me rezultat 79-82 dhe e mbylli stinorin vjeshtor në krye të tabelës.
Ndeshja ishte e barabartë gjatë gjithë kohës, derisa dallimi u bë në minutën e fundit, ku kapiteni Edmond Azemi së pari shënoi nga vija e treshit e më pas me një depërtim e rehatoi skuadrën e tij.
Përpjekjet e Yllit në fund nuk funksionuan dhe kështu e mbyllën vjeshtën me humbje.
Divine Myles ishte koshashënuesi më i miri i ndeshjes me 26 pikë, derisa te Prishtina shkëlqeu edhe Fahro Alihodzic me double-double prej 20 pikëve e 18 kërcimeve.
Te Ylli u dalluan Samir Zekiqi me 24 pikë e 8 kërcime dhe Jameel McKay me 16 pikë e 11 kërcime.
Prishtina që nuk e nisi mirë stinorin, vjeshtën e mbylli si lidere me 13 fitore e 3 humbje, derisa Ylli gjendet përkohësisht në pozitën e tretë me 10 fitore e 6 humbje.