PEJA - BASHKIMI
Fitorja e parë sezonale për Pejën ndaj Bashkimit
8 February, 2020 @20:43
Pas dy humbjeve në dy ndeshjet e zhvilluara në këtë sezon, Peja e regjistroi fitoren e parë kundër Bashkimit, duke e mposhtur kundërshtarin me rezultat 103-80.
Peja në asnjë çerek nuk ia lëshoi epërsinë skuadrës prizrenase dhe me dominim total doli fituese nga ky duel.
Koshashënuesi më i mirë te Peja ishte Dardan Berisha me 25 pikë, derisa luajti edhe me 5 asistime e 4 kërcime. Dardani mori ndihmë edhe nga Richard Jackson me 19 pikë e 12 kërcime, Drilon Hajrizi me 14 pikë, 10 kërcime e 5 asistime, Henrik Sirko me 14 pikë dhe Nigel Johnson me 12 pikë, 6 kërcime e 5 asistime.
Te Bashkimi u dalluan Terik Bridgeman me 18 pikë, Ujkan Karanezi me 14 pikë dhe Musab Mala me 13 pikë të tjera.
Që të dyja skuadrat i kanë nga 13 fitore e 9 humbje. Bashkimi aktualisht e ka epërsinë në duelet në mes vete dhe gjendet një pozitë më lartë se Peja.
Në xhiron tjetër Peja takohet me Yllin, derisa Bashkimi me Prishtinën.