FSHF-ja pranon gjithçka, vetëm ta pranojë Adnani

Pas deklaratave të djeshme në KTV të babait të talentit kosovar, Adnan Januzaj, lidhur me pranimin ose jo të kombëtares shqiptare, ka reaguar sot edhe FSHF-ja nëpërmjet një komunikate për shtyp. 

“FSHF-ja nuk dëshiron të mirret me shpjegime anësore të çështjes, sepse ato shkaktojnë dhe krijojnë keqkuptime që nuk i shërbejnë qëllimit. Ne jemi të gatshëm të pranojmë gjithçka, vetëm që i talentuari Januzaj të bëhet pjesë e kombëtares tonë dhe të kontribuoj për të ardhmen e futbollit shqiptar,” thuhet në komunikatë të Federatës shqiptare. 

“FSHF-ja zyrtarisht ka deklaruar edhe se siç është vepruar me futbollistët që sot janë pjesë e kombëtares do të vijojë punën pa asnjë ndikim, mëdyshje apo hezitim që Adnan Januzaj të vishet kuqezi për të nderuar veten, familjen dhe flamurin e të parëve të tij.” 

Kjo e fundit, për të ndikuar edhe më tej në emocionet e familjes dhe babait të tij, i cili siç u kuptua është njeriu kryesor që vendos për të ardhmen e Januzajt për cilën kombëtare do të luaj. 

E babai, Abedini, ka qenë i frustruar me kombëtaren shqiptare për mënyrën e përafrimit dhe joprofesionalizmin e tyre dhe vetëm sa s’ka thënë që Adnani kurrë s’do të luaj për Shqipërinë. Babai Januzaj ka treguar rrugët që duhet ndjekur FSHF-ja, ndërsa u ka dhënë edhe një shans, tejet të vogël, për të biseduar për të ardhmen në kombëtare të djalit të tij.