Giroud me gërshërë sjell fitoren e Arsenalit

Arsenal ka ruajtur epitetin e ekipit perfekt në Grupin H të Europa Ligës sonte, duke e mposhtur Crvena Zvezdën në Beograd, përmes një goli të bukur të Olivier Giroudit në fund të ndeshjes.

Me këtë fitore, Arsenal ka përmbyllur gjysmën e ndeshjeve të grupit me 3 fitore nga po aq ndeshje, duke marrë pikë maksimale, 9.

Në duelet tjera të orës 19:00 të Europa Ligës, vlen të përmendet suksese i debutuesve në Europë, Ostersunds, të cilët kanë ruajtur pamposhtshmërinë, duke barazuar me Athletic Bilbaon 2-2 dhe duke e ruajtur pozitën e parë në grup.

Lazio gjithashtu ka vazhduar shkëlqimin në Grupin K, ku ka mposhtur rivalin kryesor të grupit, Nice, 1-3 si mysafir, për të arritur kuotën e 9 pikëve.

Real Sociedad i Adnan Januzajt ka shënuar fitore të thellë në Shkup ndaj Vardarit, 0-6, ku Willian Jose ka shënuar 4 herë për ekipin bask.