FLORENT HADËRGJONAJ
Hadërgjonaj ende ka gjasa që të luajë për Kosovën!
16 October, 2018 @15:05
Megjithëse duket që tashmë Florent Hadërgjonaj është lojtar i përfaqësueses së Zvicrës, mundësitë që ai ta vesh fanellën e Kosovës ende mbeten të hapura.
Hadërgjonaj u ftua nga përzgjedhësi i Zvicrës Vladimir Petkovic për dy ndeshjet e muajit tetor dhe ishte pjesë e ekipit helvetik. Por mos aktivizimi i tij në këto dy ndeshje kundër Belgjikës dhe Islandës, e lë mundësinë që futbollisti ta ketë të drejtën e ndërrimit të përfaqësueses.
Sipas rregullave, futbollisti nuk ka të drejtë ta ndërrojë përfaqësuesen, nëse më parë është aktivizuar qoftë edhe për një minutë të vetme në një ndeshje zyrtare me përfaqësuesen A, kurse Hadërgjonaj deri më tani është aktivizuar vetëm në miqësore me ekipin e parë të Zvicrës dhe nuk ka asnjë minutë në ndeshjet zyrtare.
Megjithatë, gjasat që 24 vjeçari i Huddersfield që të ndërrojë ambient në nivel shtetëror duket të jenë të vogla, pasi që bisedimet e deritashme të zyrtarëve të FFK-së me të, nuk kanë dhënë rezultatet e duhura.