Hajrizi beson në kualifikim

Basketbollisti më i dalluar i reprezentacionit në ndeshjen e mbrëmshme, Drilon Hajrizi, pas humbjes nga Britania ka treguar forcën e kundërshtarit, që i ka bërë ata fitues në këtë përballje.

Kosova u mposht në Minatori nga Britania e Madhe, në ndeshjen e dytë të grupit, në kuadër të fazës së tretë parakualifikuese për Eurobasket 2021.

“Loja ka qenë shumë i mirë, por ata kanë pasur përparësi në lojtarë më të gjatë dhe më me përvojë. Kemi edhe dy ndeshje dhe akoma besojmë në kualifikim”, deklaroi Hajrizi.

Hajrizi që stinorin e fundit luajti për Bashkimin, ka qenë koshashënuesi më efikas i Kosovës në humbje ndaj Britanisë.

Kosova me dy humbje në dy ndeshjet e para ka zbehur gjasat për kualifikim në fazën kualifikuese të Eurobasket 2021, ku do ta presin superfuqitë e basketbollit evropian: Gjermania, Franca dhe Mali i Zi.

Kosovës tash i kanë mbetur edhe dy ndeshje, ku duhet të mposht thellë Luksemburgun dhe Britaninë për të shpresuar në kalim tutje.