Higuain me gola, Basha skuqet

Napoli ka vazhduar me fitore pas asaj në mesjavë ndaj Olympique Marseille. Humbja në xhiron e kaluar nga lideri i Serie A-së, Roma, nuk ka demoralizuar ekipin e Rafa Benitezit, të cilët kanë shënuar fitore të sigurtë sot ndaj Torinos ku luan edhe përfaqësuesi i kombëtares, Migjen Basha. 

Kanë qenë dy gola nga penalltitë të shënuar nga argjentinasi Gonzalo Higuain që kanë bërë dallimin në këtë ndeshje, për t’i sjellur tre pikë të reja napolitanëve dhe për të vazhduar ndjekjen e Romës në krye të tabelës. 

Në anën tjetër, Migjen Basha është futur në fillim të pjesës së dytë në lojë nga trajneri i Torinos, Giampiero Ventura, që paralajmëroi rikthimin e tij nga lëndimi i lehtë i pësuar për të cilin ka gjasa edhe të hyjë në operacion shqiptari. 

Por, Basha u përshëndet më heret sesa fishkëllima e fundit e referit kryesor, Andrea De Marco. Në fakt, De Marco, vlerësoi se Basha shtyu me qëllim dhe si lojtar i fundit Goran Pandevin gjatë një sulmi napolitan - dhe e ndëshkoi me karton të kuq të drejtpërdrejtë, përkundër se pas Bashës kishte edhe një futbollist të Torinos për të ndalur Pandevin! 

Këto kanë qenë penalltitë e para për Napolin të akorduara këtë stinor dhe të dyja u realizuan nga argjentinasi Higuain, që erdhi këtë verë nga Real Madridi, ndërsa me golat e sotëm ka arritur në kuotën e pesë golave në këtë stinor për napolitanët. 

Tabela dhe rezultatet aktuale.