IJF lëvdon ekipin kosovar dhe trajnerin Kuka

Federata Ndërkombëtare e Xhudos (IJF) ka lëvduar ekipin kosovar të xhudos pas paraqitjes fenomenale të xhudistëve të drejtuar nga Driton Kuka në World Masters të Dohas në Katar.

Katër nga 5 xhudistët e Kosovës të paraqitur në garë morrën medalje, ndërsa Distria Krasniqi ishte e artë, e Majlinda Kelmendi, Nora Gjakova e Loriana Kuka të bronztën, derisa Akil Gjakova arriti te tetëshja më e mirë.

Katër medalje nga pesë garues është bilanc që nuk ka kaluar pa marrë vëmendje. Masters është garë që mbledh vetëm xhudistët më të mirë nëpër kategori.

“Krahasuar me numrin e atyre që e praktikojnë xhudon në këtë shtet, pa dyshim skuadra me vlerën më të mirë për paratë në xhudo. Puna e bërë nga kryetrajneri Driton Kuka është model i llojit të veçantë,” ka shkruar IJF-ja.