EKSKLUZIVE
Komuna ndërpren financimin e Bashkimit
9 September, 2019 @15:05
Skuadra e KB Bashkimit që është duke bërë përgatitjet për stinorin e ri, ka marrë një lajm jo të mirë sot nga Komuna e Prizrenit, që është edhe financuese kryesore e ekipit.
Sipas burimeve të TopSporti.com brenda klubit, KB Bashkimit i është bërë e ditur që ky stinor do të jetë i fundit që KK do ta financojë ekipin, ndërsa prej stinorit 2020/21 kjo mënyrë e financimit do të ndërprehet.
Kështu, KB Bashkimi, që është ende në fazën e pagesës së borxheve të trashëguara nga kryesia e kaluar e klubit, do të ketë edhe më të vështirë punën në verën e ardhshme, kur do të duhet të gjejë mënyra tjera të financimit për të mbajtur gjallë ekipin.
Bashkimi në stinorin e kaluar ka arritur gjysmëfinalen e PlayOffit të Superligës, ndërsa dy vite më parë, ishte bërë për herë të parë në histori, kampion i Kosovës.
Ekipi këtë stinor do të drejtohet nga trajneri vendor, Illmen Bajra. Ndërsa ende zyrtarisht nuk ka bërë të ditur nëse do të ketë përforcime të huaja në ekip për stinorin 2019/20.
Shorti për edicionin e ri të garave të Superligës do të hidhet të premten, më 13 shtator.
