VEDAT MURIQI
Makineria e golave Muriqi, tre golat e fundit të ekipit me vulën e tij
22 July, 2019 @22:30
Vedat Muriqi 25 vjeç është duke kaluar fazë tejet të mirë përgatitore me ekipin e madh turk, Fenerbahçe. Që prej debutimit të tij në miqësore dhe që në ndeshjen e dytë miqësore, tashmë ai ka tre gola të shënuara për ekipin e tij të ri.
“Dua të shkruaj emrin tim në histori të klubit, për këtë jam këtu. Mendoj se ia nisa mirë, por shpresoj që kjo performancë e imja të vazhdojë në këtë mënyrë edhe kur ia nis Superliga,” ka thënë Muriqi pas barazimit të Fenerbahçes me Wolfsburgun në miqësoren e zhvilluar në Austri.
“Wolfsburg luante miqësoren e gjashtë. Ata tashmë janë komponuar. Ndërsa për ne ka qenë vetëm ndeshja e tretë miqësore, kurse e dyta për mua. Për 10-15 minuta ndaj tyre nisën lojën tonë dhe në miqësore edhe pse rezultati s’është i rëndësishëm, fitorja ta ngrit moralin,” ka thënë Muriqi për mediat turke, ndërsa në duelin e radhës i pret Hertha e Berlinit.
Reprezentuesi i Kosovës ka marrë lëvdata nga të gjithë analistët e futbollit në Turqi, ndërsa dalëngadalë edhe tifozët e ekipit po e përqafojnë, pasi që kishte keqkuptime të mëdha derisa iu realizua transferi me disa deklarata.
Muriqi shënoi dy gola në fitoren e Fenerbahçes ndaj Bursasporit, ndërsa sot shënoi golin e avantazhit të ekipit të tij ndaj Wolfsburgut.
Ndërsa Okan Buruk, ish trajner i tij në një prononcim për NTV-në ka thënë: “Ai ka përmirësuar shumë veten në vitet e fundit. Njeri i mirë, lojtar i mirë, sportist i mirë, karakter i mirë - kur i bashkon të gjitha këto, lirisht mund të them se ai është sulmuesi më i mirë i Superligës turke tashmë.”