Mbetet në Everton!

Mesfushori belg, Marouane Fellaini, kërkohet nga Arsenal, të cilët janë të gatshëm të paguajnë afro 30 milionë euro për të çliruar atë nga kontrata me Evertonin.

S’SHKON ASKUND

Ai gjithashtu është përfolur si mundësi kalimi në Chelsea dhe Manchester United. Mirëpo, trajneri i ri i Evertonit, Roberto Martinez, ka përjashtuar çdo mundësi që ai të largohet nga klubi. 

“Dua që ai të jetë i gatshëm për stinorin tjetër, pasi që do të ketë rolin më të rëndësishëm në skuadër. Ai e ka të qartë se para tij është një stinor i madh,” ka thënë Martinez. 

“Ai nuk shkon askund, ngase të gjithë llogarisin në atë. Edhe Fellaini vetë i ka thënë kryetarit Bill Kenwright, se dëshiron të mbetet në Everton.” 

LIGA E KAMPIONËVE

Roberto Martinez, trajner spanjoll, është duke e shikuar mundësinë që në stinorin e parë të tij me Evertonin t’i ngrisë ata në luftë për vendin e katërt - ashtu që klubi i kaltër nga Liverpool të sigurojë Ligën e Kampionëve. 

Evertoni këtë stinor ka përfunduar në vendin e gjashtë dhe pas gati njëqind viteve kanë përfunduar dy stinorë radhazi në një pozitë më të lartë në tabelë sesa rivali i qytetit - Liverpool.