Memushaj e Xhimshiti, mbeten pa fitore

Dueli i sontëm i Serie A ka qenë derbi i fundit të klasifikimit dhe i ekipeve ende pa fitore në elitë. Në fund, Verona ka arritur të dalë fituese si vendas në Marc’Antonio Bentegodi ndaj Beneventos debutuese në Serie A, duke i mposhtur me rezultat minimal, 1-0, me golin e shënuar nga Romulo.

Ledian Memushaj dhe Berat Xhimshiti kanë qenë për 90 minuta në fushë për ekipin e Beneventos, por ekipi i tyre edhe pas 8 xhirove të para në Serie A, në ndeshjen që më së shumti gjasa kanë pasur të fitojnë pikën e parë të stinorit - mbeti pa fitore.

TABELA AKTUALE E SERIE A

Benevento prej minutës së 37 të ndeshjes luajti me 10 lojtarë në fushë, pasi që mbrojtësi Luca Antei u skuq dhe la ekipin me 10 lojtarë në fushë.

Me këtë fitore Verona del nga zona e rrezikshme pas 8 xhirove dhe shënon fitoren e parë të stinorit, derisa Benevento tashmë urgjentisht duhet ndërrmarë masa në ekip, pasi që prej tash seriozisht kanë rrezikuar mbijetesën në elitë, kur dihet se janë ekipi me më së paku gola të shënuara (2) dhe me më së shumti të pranuara (19) për 8 xhirot e para të stinorit.