SUPERKUPA (F): PRISHTINA - BASHKIMI
Mposhtin Prishtinën, vajzat e Bashkimit fitojnë Superkupën!
24 September, 2019 @19:25
Vajzat e Bashkimit janë fitueset e Superkupës së sezonit 2019/2020!
Skuadra e drejtuar nga trajneri turk Furkan Saglik arriti që në finalen e Superkupës ta mposhtë Prishtinën, kampionen në fuqi të Kosovës në basketboll, në ndeshjen e luajtur në “Mizahir Isma” të Rahovecit, për ta fituar kështu Superkupën në ndeshjen e parë të sezonit të ri.
Vajzat e Bashkimit krijuan epërsi 12 pikëshe qysh pas pjesës së parë, derisa loja e tyre e mirë vazhdoi deri në fund të ndeshjes, duke bërë që ndeshja të mbyllet me rezultatin përfundimtar 70-83 (15-23, 17-21, 16-22, 22-17).
Më të dalluarat në këtë humbje të Prishtinës sonte ishin Danisha Shaw, ish-basketbollistja e Bashkimit, me 31 pikë, 9 kërcime e 2 asistime dhe Irma Konjusha me 13 pikë (vetëm 2 pikë në pjesën e dytë), 4 kërcime e 4 asistime, kurse te Bashkimi katër lojtare shënuan pikë dyshifrore. Më të dalluarat ishin Khadija Brown me double-double prej 32 pikëve, 17 kërcimeve e 1 asistimi dhe Aisha Muhamed gjithashtu me double-double prej 18 pikëve e 12 kërcimeve e 3 asistimeve, ndërkohë pikë dyshifrore patën edhe Arbnore Përquku (15) dhe Saranda Daci (12).
Ky është titulli i parë i trajnerit Saglik si trajner i Bashkimit, derisa të dyja skuadrat që u përballen sonte, pritet të jenë rivale të njëra-tjetrës edhe në luftë për titullin kampion në sezonin e ri që nis shumë shpejt.