PARA NDESHJES SË FUNDIT TË GRUPIT K

Marjan Ilievski dhe Edmond Azemi në konferencën e sotme për shtyp të Sigal Prishtinës/ Foto: FBK

Ndeshja zgjat dy ditë

30 November, 2015 @20:43

Sigal Prishtina nesër mbrëma pret AEK Larancan në ndeshjen e fundit të fazës së parë grupore të FIBA Europe Cup.

Sigal Prishtinës vetëm fitorja i kryen punë për të shkuar mëtutje, por ata do të duhet të presin edhe rezultatin nga përballja e pasnesërme ndërmjet Astanas dhe Energias.

“Kjo është ndeshja e fundit në grup dhe askush nuk ka pritur që pikërisht ky duel të vendos për fatin e tri skuadrave për të kaluar në fazën e dytë, me përjashtim të Energias që tashmë e ka siguruar fazën tjetër. Gjasat për ne që të kualifikohemi ekzistojnë dhe kjo është me rëndësi. Nuk është reale të prognozojmë rezultatin, por detyra jonë është që kundër AEK-ut të japim maksimumin dhe të marrim një rezultat sa më të mirë. Kemi probleme të mëdha, me lëndime dhe lodhje të lojtarëve. Kjo garë është shumë e fortë, kurse me sa kam unë njohuri ne jemi ekipi i vetëm që marrim pjesë në tre gara njëkohësisht. Ndeshja jonë do të zgjas dy ditë, pasi një ditë pas duelit tonë me AEK-un do të përballen Astana - Energia dhe nuk do të jemi të qetë deri pas përfundimit të kësaj ndeshje. AEK-u është një skuadër serioze me lojtarë cilësor, kurse unë duhet ta përmendi Primozh Brezecin, që i shton ekipit cilësi dhe përvojë. Në ndeshjen e parë në Qipro, AEK-u ka dëshmuar se është efikas në gjuajtjet për tri pikë, kurse ne do të mundohemi ta ndalim Brezecin si pikën e tyre më të fortë, edhe pse ne jemi të hendikepuar. Unë nuk mund të parashikoj se çfarë do të ndodh në ndeshjen tjetër, Astana-Energia, që luhet një ditë më vonë. Do të bëjmë tifozllëk për Energian atë ditë. Por sidoqoftë, nëse fitojmë edhe ne edhe Astana, shpresoj të shkojmë nga pozita e tretë,” ka thënë Marjan Ilievski, trajner i Sigal Prishtinës një ditë para ndeshjes në konferencën për shtyp.

Sigal Prishtina përveç fitores ndaj AEK-ut duhet të pres edhe fitoren e Energias rumune për t’u kualifikuar nga pozita e dytë.

Në të kundërtën, nëse Astan mposht Energian, Sigal Prishtinës i mbetet të shpresojë që të shkojë si njëra ndër të tretat më të mira.

Sigal Prishtina - AEK luhet nesër mbrëma në Pallatin e Rinisë dhe të Sporteve në Prishtinë me fillim nga ora 19.