KOSOVA U18 NË EVROPIANIN E DIVIZIONIT B
Një fitore, për të përfunduar të parafundit në evropian
5 August, 2019 @16:42
Kosova U18 ka përfunduar në pozitën e parafundit në Kampionatin Evropian të Divizionit B. Të përzgjedhurit e Gyltekin Selimit, nuk kanë shënuar asnjë fitore në kampionat, deri te ndeshja e fundit, kur aty u ndeshën me bashkëmoshatarët e Luksemburgut për të fituar 67-49 dhe për t’i ikur pozitës së fundit në garë.
Me këtë fitore, Kosova U18 përfundoi në pozitën e 23 në evropianin që numëron 24 skuadra pjesëmarrëse.
Kosova U18 në fazën grupore pësoi radhazi në të gjitha ndeshjet. Së pari nga Hungaria 78-55, pastaj nga Suedia 76-60, Austria 92-79, Bellorusia 83-74 dhe Portugalia 72-47.
Pas fazës grupore ekipi shpresat e basketbollit të Kosovës pësuan edhe në ndeshjet për radhitjen përfundimtare të evropianit. Nga Norvegjia 87-72, nga Rumania 79-61, ndërsa fituan në fund Luksemburgun për të siguruar pozitën e parafundit aty.
Kampionati Evropian U18 i Divizionit B u mbajt në Oradea të Rumanisë prej 26 korrikut deri më 4 gusht, ndërsa kampion doli Izraeli që në finale mposhti Poloninë, kurse vendi i tretë i takoi çekëve, që lanë pa medalje shpresat e Maqedonisë Veriore.