Peja pëson nga Beroe

Skuadra e Pejës ka regjistruar humbje në turneun miqësor në Bullgari, ku po zhvillon përgatitjet e fundit para fillimit të stinorit të ri në Superligë e BIBL.

Ekipi verdhezi është mposhtur ngushtë nga Beroe, me 3 pikë diferencë, 76-73.

Më efikasi te Peja ka qenë përforcimi i fundit i skuadrës, LaMarcus Reed, i cili ka shënuar 21 pikë në këtë përballje. Kurse pas tij me radhë ka ardhur Noah Dahlman me 18 të tjera.

Ndërsa faqja zyrtare e Pejës ka bërë të ditur se trajneri i ri i ekipit, Aleksandar Todorov, ka shfrytëzuar thuajse të gjithë lojtarët për shkak të koordinimit më të mirë të skuadrës, që do t’i duhet pejanëve për shkak të ndeshjeve të shumta që i presin këtë stinor.

“Trajneri Todorov po shfrytëzon këto ndeshje për përgatitje të tërë ekipit, për ndeshjet e shumta që na presin këtë stinor,” ka bërë të ditur kbpeja.com.

Pas kësaj ndeshjeje Peja do të zhvillojë edhe një ndeshje, ndaj fituesit të duelit Academic Plovdiv - Spartak Pleven.