PRIZRENI - RAHOVECI
Për ditëlindje i dhurojnë fitore dhe rrëzojnë liderin nga kreu
14 December, 2019 @20:39
Basketbollistët e Prizrenit i kanë dhuruar një dhuratë të lezetshme trajnerit të tyre, Arbnor Rifati, që kishte ditëlindjen.
Në një duel dramatik, ku minuta e fundit e ndeshjes zgjati gati 20 minuta të kohës, Prizreni fitoi derbin ndaj liderit Rahoveci 92-88, derisa pikët e fundit në ndeshje kryesisht u shënuan nga gjuajtjet e lira, që vinin për shkak të faulimeve taktike të lojtarëve.
Përndryshe, kjo është humbja e tretë me radhë e Rahovecit, që tashmë bie nga kreu i Superligës. Në anën tjetër Prizreni me këtë fitore përfundon pjesën e parë të sezonit me bilans 9-7, pasi që në xhiron e radhës pushon dhe shkon në pushim dimëror.
Malcolm Canada ka qenë më efikasi në këtë duel për Prizrenin. Ai ka shënuar 26 pikë e 7 asistime në fitoren e ekipit të tij, ndërsa Ty Nichols ka dhënë 22 pikë e 5 kërcime.
Qendra Urim Zenelaj si zakonisht ka përfunduar ndeshjen me double-double, duke shënuar 16 pikë e 19 kërcime në fitoren e ekipit të tij.
Te vreshtarët, që tashmë mund të thuhet se janë në krizë të rezultateve pasi që kanë humbur tre ndeshje të rëndësishme në tre duelet e fundit të tyre nën drejtimin e trajnerit të dytë të ekipit këtë stinor, Marjan Ilievski, Joshua McFolley e Darell Davis kanë qenë më efikasit dhe të vetmit me pikë dyshifrore.
Secili shënuan nga 27 pikë, por asnjë lojtar tjetër në skuadër nuk arriti të kalojë mbi shifrën e 9 pikëve, ku u ndalën edhe Alban Veseli e Josh Davis.
Me këtë fitore, siç u cek, Prizreni përfundon vjeshtën në Superligë me bilanc 9-7, ndërsa Rahoveci pas tre humbjeve radhazi, përpos që humbi kreun e klasifikimit tashmë në xhiron e fundit do të ketë mundësi këndelljeje në përballjen e fundit të pjesës së parë të stinorit, ndaj Pejës.