Prezantohet Reja, mban konferencën e parë

Tashmë është zyrtarizuar plotësisht!

Edi Reja është përzgjedhësi i ri i Kombëtares Shqiptare të futbollit, me trajnerin italian që u prezantua sot zyrtarisht në ambientet e Kombëtares, ndërkohë që mbajti dhe një konferencë për media.

EURO 2020 - GRUPET KUALIFIKUESE

“Jam i lumtur që kam ardhur në krye të Shqipërisë.

Mund të punoja edhe në Itali por dëshiroja një përvojë në drejtimin e kombëtareve dhe jam i lumtur që mora drejtimin e Shqipërisë. Fillimisht kontrata ime është deri në nëntor, e deri atëherë do të shohim se si shkojnë gjërat dhe do të vendosim për të ardhmen.

Kam parë që Shqipëria luan me 4 prapa, unë zakonisht preferoj 3 qendërmbrojtës, mirëpo do të shohim se si do të veprojmë. Nuk dua të ndryshoj shumë filozofinë e krijuar nga De Biazi dhe e rëndësishme është që skuadra të punojë.

Unë kam punuar edhe si vëzhgues talentësh më parë dhe jam i angazhuar që edhe të sjellë lojtarë te Shqipëria. Dua disciplinë dhe preferoj skuadra agresive, por jo gjithmonë, kjo varet edhe nga grupi.

Në përgjithësi, shpresoj të jetë një përvojë e mirë për mua dhe gjërat të ecin mirë.” - u shpreh Reja në konferencën e tij të parë për shtyp.

Testin e parë me Shqipërinë Reja do ta ketë më 8 qershor, datë në të cilën Shqipëria luan si mysafire e Islandës në kuadër të Grupit H kualifikues drejt EURO2020.