Prishtina mposht Llapin pas penalltive, kalon në gjysmëfinale

Një ndeshje mjaft interesante u zhvillua sot mes Llapit dhe Prishtinës në Podujevë. Të dyja skuadrat luftuan shumë për të kaluar në gjysmëfinale të Kupës, e në fund këtë e arriti Prishtina, e cila u tregua skuadër më e saktë në gjuajtjen e penalltive.

Epërsia e Llapit erdhi pak para fundit të pjesës së parë, me Mirlind Dakun që shënoi një gol të bukur nga gjysma e fushës, duke bërë që vendasit të shkonin në pushim me epërsi 1-0.

SKEMA E KUPËS

Në pjesën e dytë vendasit reaguan me disa zëvendësime ofansive, ndërsa goli i barazimit u shënua nga Drashko Bozhoviç, i cili shënoi me një goditje zhagazi nga gjuajtja e lirë. Në vazhdim të ndeshjes gola nuk pati dhe ndeshja shkoi në vazhdime.

15 minutëshi i parë i vazhdimeve u mbyll pa gola, mirëpo me të filluar pjesa e dytë e vazhdimeve, Drashko Bozhoviç e gjeti golin e dytë personal dhe të dytin e skuadrës, për t’i kaluar mysafirët në epërsi. Bozhoviç kësaj radhe shënoi me kokë pas krosimit nga Hoxha.

Një minutë pas golit të dytë të Prishtinës, Florim Bërbatovci i vendasve u përjashtua me karton të kuq, por kjo nuk e ndaloi Llapin që ta gjente golin e barazimit. Autori i golit të parë, Mirlind Daku, shënoi përsëri për 2-2, për t’i barazuar përsëri shifrat mes skuadrave.

Në minutat e mbetura gola të tjerë nuk pati dhe fituesi u detyrua të përcaktohej pas gjuajtjes së penalltive, ku më e suksesshme u tregua skuadra e Prishtinës dhe në këtë mënyrë e arriti kalimin në gjysmëfnale.

Kështu, Prishtina i bashkangjitet Drenicës, Vëllaznimit dhe Vushtrrisë në katërshen e gjysmëfinalistëve. Çiftet gjysmëfinaliste do të kuptohen pas shortit, ndërsa ndeshjet gjysmëfinale luhen sipas sistemit vajtje-ardhje.

Më poshtë janë paraqitur goditjet e penalltive nga të dyja skuadrat në mënyrë kronologjike: