Skënder Gega jep dorëheqje

Trajneri i njohur shqiptar, Skënder Gega, edhe zyrtarisht më nuk është trajner i ish-kampionit të Shqipërisë, Kukësi.

Njoftimin e ka zyrtarizuar klubi verilindor i Shqipërisë pak më parë, derisa ka bërë të ditur se pas dorëheqjes së ofruar nga trajneri për shkak të rezultateve të fundit të skuadrës, kryetari Safet Gjici ka pranuar vendimin e Gegës.

“Prej disa muajsh kam qenë në krye të Kukësit. Edhe pse kam pasur mbështetjen, besimin dhe respektin për gjithë situatën e krijuar, marr përgjegjësinë dhe vendimin që të mos vazhdojë më në pozicionin e trajnerit të skuadrës dhe ju bëj me dije se nuk ka vend për aludime tjera në këtë vendim,” ka bërë të ditur KF Kukësi mesazhin e Gegës dërguar klubit.

Kukësi pas një serie të mirë të rezultateve dhe ndjekjes së kreut që është duke e mbajtur Vllaznia për momentin, në tre ndeshjet e fundit ka regjistruar 2 humbje e 1 barazim, duke mos fituar asnjë - dhe kështu, para ndeshjes ndaj Teutës që zhvillohet më 30 dhjetor 2020, ekipi do të dalë në fushë me një trajner tjetër.

Aktualisht, Kukësi është i katërti në renditje tabelare, me 8 pikë më pak se Vllaznia lidere.

TOP 5 NË SUPERIORE:

1. Vllaznia 25p
2. Partizani 19p
3. Teuta 17p
4. Kukësi 17p
5. Kastrioti 16p.

Kujtojmë, gjatë muajit të kaluar tropojani 57-vjeç, Gega, ka vuajtur shumë keq nga coronavirusi me ç‘rast trajneri në fjalë shkoi për në Turqi për një trajtim më të mirë, gjë që edhe ia shpëtoi jetën atij.