PRISHTINA 4-1 DUKAGJINI
Thaqi shkëlqen me tre asistime, Prishtina çlirohet në 22 minutat e fundit
20 June, 2020 @21:41
Prishtina ka regjistruar edhe fitoren e radhës në Superligë të Kosovës. Bardhekaltërit kanë mposhtur sot Dukagjinin, në ndeshjen e xhiros së XXV 4-1 [Oto John 30, Ahmed Januzi 68, Meriton Korenica 85, Kreshnik Uka 88 - Altin Merlaku 43].
Prishtina nisi mirë ndeshjen kur shënoi pas gjysmë ore lojë me nigerianin në formë Oto John (30’), por barazimi i shpejtë i mysafirëve la të befasuar vendasit. Ishte Altin Merlaku (43’) që me golin e tij çoi skuadrat me rezultat neutral në pushim.
Të përzgjedhurit e Armend Dallkut u munduan mjaft në pjesë të dytë derisa arritën të çajnë Dukagjinin për të ri-marrë epërsinë.
E prej atij momenti gjërat shkuan pak më lehtë për vendasit që kontrolluan me më pak brengë lojën dhe shkuan te fitorja, në dukje e rehatshme në fund.
Në këtë ndeshje për Prishtinën shkëlqeu mbrojtësi i krahut dhe reprezentuesi Armend Thaqi, që ka bërë tre asistime për bashkëlojtarët e tij që shënuan.
Ahmed Januzi (68’) i dha epërsinë Prishtinës, ndërsa krejt në fund Meriton Korenica (85’) dhe Kreshnik Uka (88’) vulosën rezultatin në 4-1.
Në xhiron e radhës Prishtina do të ketë punë të vështirë ndaj Llapit në Zahir Pajaziti, ndërsa Dukagjini pret Gjilanin në Klinë.