ILIR SELMANI
Trepça synon që me Torcidën t’i kalojë më lehtë duelet
30 September, 2019 @14:25
Trajneri i Trepçës, Ilir Selmani, për faqen zyrtare të FBK-së u shpreh për synimet dhe vështirësitë e klubit mitrovicas.
“Përgatitjet i kemi filluar me vonesë, për shkak të kushteve të rënda financiare që i kemi.
Është e vështirë që të punohet profesionalisht, sepse për dy-tri javë nuk mundesh ta përgatitesh skuadrën për një kampionat. Aktualisht kemi tre lojtarë të huaj në skuadër dhe fatmirësisht i kemi mbajtur lojtarët vendor përveç Samir Zekiqit. Jemi një numër i vogël i lojtarëve në rotacion, por në mesin e tyre janë edhe 3-4 lojtarë të rinjë që vijnë nga grupmoshat e juniorëve dhe mua si trajner më gëzon ky fakt.
Jemi duke u stërvitur dhe po mendoj që janë duke shkuar mirë stërvitjet dhe shpresoj që do të jemi të gatshëm për kampionat, edhe pse jo në formën më të mirë të mundshme,” ka thënë Selmani për FBK-në.
Trajneri Ilir Selmani, për rezultate të mirë ka kërkuar edhe përkrahjen e Torcidave.
“Sa i përket synimeve, në çfarë gjendje jemi aktualisht, ne do të mundohemi të japim maksimumin e të bëjmë lojëra të mira, edhe pse do të kemi shumë vështirë, sepse të gjitha skuadrat kanë angazhura nga 5-6 lojtarë të huaj. Në këtë gjendje që jemi, na duhet përkrahja maksimale nga qytetarët e Mitrovicës dhe nga tifozët tanë Torcida që ta tejkalojmë këtë gjendje, duke shpresuar në ditë më të mira për sportin mitrovicas.”
Trepça në xhiron e parë ka pushuar, kurse të mërkurën do ta pret Bashkimin në palestrën “Minatori”.