TREPÇA 77-88 YLLI
Ylli triumfon në “Minatori”
23 November, 2019 @20:50
Fitorja e tretë me radhë për Yllin e këndellur pas ardhjes së trajnerit Dragan Radovic në ekip, ndërsa suharekasit kanë dalë fitues në Minatori ndaj Trepçës me lojë të mirë të treguar në çerekun e dytë dhe të fundit.
Ylli ka mposhtur Trepçën, duke i lënë këta të fundit të rrezikuar, të parafundit në tabelë, me 11 pikë dallim.
Trepça e nisi mirë ndeshjen 24-19, por pastaj Ylli u këndell, 16-25 për të marrë epërsinë në fund të pjesës së parë, 40-44.
Në pjesën e dytë lufta e mitrovicasve nuk dha shumë dallim në pikë, ndërsa Ylli mbylli më mirë ndeshjen në fund, për të fituar 77-88 [24-19, 16-25, 19-18 dhe 18-26].
Alante Fenner shënoi 21 pikë, 5 asistime e 6 kërcime në fitoren e suharekasve, ndërsa me 20 pikë u dallua edhe ish lojtari i Trepçës, që tash mbron ngjyrat e Yllit, Samir Zekiqi, që kreu ndeshjen me double-double pasi që regjistroi edhe 10 kërcime e 4 asistime.
Te vendasit u dallua DJ Hanes me 26 pikë, 8 asistime e 6 kërcime, ndërsa 18 pikë të tjera e 6 kërcime shënoi Besnik Azemi, por nuk mjaftuan për të shënuar fitoren e tretë të stinorit për ekipin e drejtuar nga Gazmend Asllani.
Kështu, Ylli me këtë fitore ngritet në pozitën e tretë të klasifikimit me bilanc 7-3, ndërsa Trepça mbetet e parafundit me bilanc 2-8.