FBK publikon datën e shortit për stinorin e ri

Federata e Basketbollit të Kosovës (FBK) ka bërë të ditur sot edhe datën se kur do të hidhet shorti për ndeshjet e stinorit 2025/26 në kuadër të Superligës së Kosovës.

Një stinor, që pritet të jetë i zjarrtë bazuar në transferet dhe afrimet që po bëjnë tetë ekipet e Superligës dhe ku më shumë se gjysma e elitës po synon titullin kampion, FBK ka shkruar se shorti do të hidhet më 12 shtator 2025, të premten.

Pritet luftë e zjarrtë gjatë stinorit

Një pjesë e madhe e përforcimeve të ekipeve të Superligës veçse janë zyrtarizuar. Shtatë nga tetë ekipe të Superligës kanë sjellë trajnerë me përvojë dhe të huaj, ndërkaq vetëm Bujar Loci i Grapeland, ekip që do të debutojë në Superligë, është trajner vendor që nis këtë stinor.

Për më tepër, Trepça dhe Bashkimi kanë konfirmuar pjesëmarrjen në gara të FIBA Europe. Mitrovicasit janë pjesë e Basketball Champions League, ndërkaq prizrenasit të FIBA Europe Cup. Në anën tjetër, Peja e Prishtina, kanë konfirmuar pjesëmarrjen në ligën ENBL, që është zgjeruar këtë stinor.