Trevon Allen, përforcimi i radhës i Yllit

Pas zyrtarizimit të lojtarëve vendorë, Ylli ka nisur radhazi të zyrtarizojë edhe ardhjet e huaja në ekip, ndërsa pas Lovre Basicit dhe Dwayne Cohillit, sot ka bërë të ditur se ka arritur marrëveshje me amerikanin Trevon Allen.

“Trevon Allen i bashkohet Golden Eagle Yllit për sezonin 2025/2026, me misionin e vetëm që në vitin jubilar të 50-vjetorit të klubit, të rikthejë skuadrën te sukseset.” — shkroi KB Ylli në njoftim.

I lindur në vitin 1989, Allen së fundi ka qenë pjesë e elitës greke të basketbollit, ndërsa ka djersitur fanellën e AS Karditsas. Ai aty ka pasur mesatare prej 24 minutave për ndeshje, ku ka shënuar 11.3 pikë, 2 asistime e 2.5 kërcime mesatarisht.

Amerikani ka bërë karrierë më parë edhe në Rumani, Serie B të Italisë, ndërsa është playmaker 187cm. i gjatë. Ylli këtë stinor do të drejtohet nga trajneri grek, Fotis Takianos, që më parë ka punuar te Bashkimi dhe Rahoveci dhe ka përvojë në Superligë të Kosovës si trajner.