Ballkani mposhti kampionen dhe mori lidershipin!
Debutim shumë i mirë i trajnerit të ri të Ballkanit. Fitore në derbi si mysafir, ndërsa pos kësaj edhe marrja e kreut! Mislav Karoglan ka debutuar në mënyrën më të mirë te suharekasit, të cilët e prezantuan gjatë javës që kaloi, derisa ai zëvendësoi të larguarin Orges Shehi në këtë detyrë.
Sa i përket lojës, ajo gjithashtu ishte e mirë për sy. Raste nga secila palë, por edhe gola në të dyja anët. Epërsia e suharekasve erdhi me gol të bukur të Bleart Tolajt, ndërsa shpejt barazuan vendasit me Kristal Abazajn!
Ballkani përsëri në vrull, shënoi edhe dy herë dhe shkoi në pushim me qetësi, 1-3. E tëra që arriti të bëj Drita përkundër dominimit në pjesë të dytë ishte edhe një gol me Abazajn, sa për të përcaktuar përfundimtaren, Drita – Ballkani 2-3 [Kristal Abazaj 23′, 58′ — Bleart Tolaj 12′, Giovanni Ribeiro 32′, Walid Hamidi 34′].
Suharekasit kryen ndeshjen me 10 lojtarë, pasi që mbrojtësi Geralb Ismajli me tu futur në lojë (86′), pas pak minutash mori karton të kuq! Sidoqoftë, kjo tani pak ka rëndësi për Ballkanin që me trajnerin e ri festojnë fitoren në derbi dhe kreun e Superligës!
Ballkani pas 15 xhirosh në Superligë është në vend të parë dhe ka 26 pikë, sa ka edhe Prishtina në vend të dytë. Drita është e katërta me një ndeshje më pak, me 23 pikë.
