Edhe Rahoveci 029 mposhti Bashkimin
Pas disfatës nga Vëllaznimi në ndeshjen e parë të ciklit të dytë të dueleve të Superligës, Bashkimi ka pësuar edhe ndaj Rahovecit 029! Një start aspak i mirë i ciklit të dytë të ndeshjeve nga lideri i deritashëm i Superligës që nisi stinorin me 7-0!
Rahoveci 029 në anën tjetër ka luajtur lojë tepër angazhuese dhe nuk është ndarë asnjëherë nga lufta për të kërkuar fitoren më shumë në këtë përballje, që në fund edhe e arriti pasi që në çerekun e fundit bëri dallimin e mjaftueshëm (26-18) për të fituar duelin, 77-72.
Kentrell Pullian ishte në ditën e tij, ndërsa shënoi 31 pikë, 9 asistime dhe 5 kërcime në fitore të vreshtarëve të drejtuar nga Bujar Loci. Pos tij, janë dalluar edhe Julian Roche e Anthony Patty. Roche luajti me double-double prej 18 pikëve dhe 10 kërcimeve, kurse Patty dha 14 pikë, 2 asistime e 9 kërcime në këtë fitore të madhe të Rahovecit 029.
Në anën tjetër, prizrenasit që erdhën si liderë në “Mizahir Isma” në çerek të fundit humbën lojën! Për ata nuk mjaftuan as 28 pikët e Kyan Andersonit, që bëri edhe 6 asistime e 2 kërcime në këtë disfatë! Pos tij, ka qenë vetëm edhe Jeremiah Bailey që shënoi pikë dyshifrore. Bailey luajti me double-double prej 13 pikësh e 12 kërcimesh.
Kjo është ndeshja e dytë e Bashkimit radhazi që po mposhtet në Superligë. Të dyja këto disfata erdhën prej se nga ekipi u largua Jan Palokaj, që shkoi te Cibona e Zagrebit.
Rahoveci 029 me këtë fitore ka përmirësuar bilancin në Superligë me 4-5, derisa Bashkimi tani është në 7-2.
