Jan Palokaj ndahet nga Bashkimi!
Lider i Superligës me shtatë fitore nga shtatë ndeshjet e para. Ecuri debutuese shumë të mirë evropiane në FIBA Europe Cup. Por, Bashkimi nuk arriti ta mbajë njërin nga lojtarët më të mirë të ekipit në muajt e parë të stinorit 2025/26.
Me marrëveshje të dyanshme, për shkak të një pike në kontratë, Bashkimi ka bërë të ditur se ka ndarë rrugët me Jan Palokajn. Basketbollisti në fjalë ka kaluar te Cibona e Zagrebit.
“Me marrëveshje të dyanshme, Jan Palokaj vazhdon karrierën e tij te Cibona, pasi kontrata e tij ishte e hapur për ekipet e Europës.
I urojmë shumë suksese në sfidat e reja dhe falënderojmë për kontributin e tij te ekipi ynë.” — shkroi KB Bashkimi në njoftim.
Palokaj (25) në Superligë të Kosovës ka pasur mesatarisht 28.1 minuta në lojë për Bashkimin. Ka shënuar 11.4 pikë, 1.4 asistime dhe 3.9 kërcime për ndeshje. I njëjti, në FIBA Europe Cup ka pasur mesatare prej 25.8 minutave. Ka shënuar 9.9 pikë për ndeshje mesatarisht bashkë me 2 asistime e 2.3 kërcime.
Se si do t’ia dalë tani ciklit të dytë në Superligë Bashkimi pa njërin ndër më të dalluarit prej vendorëve në ekip, mbetet të shihet në duelet e ardhshme të elitës në Kosovë, pasi që duelet ndërkombëtare për prizrenasit kanë marrë fund, në grupin mjaft interesant të FIBA Europe Cup. Të gjitha skuadrat përfunduan me bilanc 3-3, por për shkak të koshdallimit më të dobët, Bashkimi e kreu atë të fundit!
