Liga e Konferencës, Drita arrin mbi 4 milionë euro fitim
Pas fitores së madhe të shënuar mbrëmë ndaj Shkëndijës në kuadër të Ligës së Konferencës, Drita, ka arritur në kuotën e 8 pikëve aty dhe është akoma e pamposhtur!
Manaj vulosi fitoren
Gjilanasit janë duke shkruar histori, ndërsa golin e fitores në ndeshjen që u bë si festë e madhe shqiptare për nder të 28 nëntorit, e shënoi sulmuesi Arb Manaj! Manaj shënoi në minutën e 20-të të ndeshjes golin, që doli të jetë edhe rezultat përfundimtar, Drita – Shkëndija 1-0!
Nga 38 skuadra në renditjen tabelare të Ligë së Konferencës, Drita aktualisht pas 4 xhirosh është e teta, me mundësi reale për të arritur kualifikimin tutje pa pasur nevojë për ndeshje playoffi! Kjo, po që do të ishte sukses historik – pasi që këtë nuk e ka arritur asnjë ekip shqiptar anëembanë deri tani!
Arka e mbushur
E në anën tjetër, krejt ky sukses edhe po shpërblehet. Tashmë bardhekaltërit kampionë aktual të Kosovës kanë arritur shifrën e mbi 4 milionë eurove, duke llogaritur të gjitha mjetet e fituara që nga fillimi i stinorit në gara evropiane.
Drita i garantoi 3.1 milionë euro në momentin kur siguroi pjesëmarrjen në fazën e ligës në Ligë të Konferencës, pasi që kaloi suksesshëm fazën kualifikuese. Tani ekipi i drejtuar nga Zekirija Ramadani ka 2 fitore dhe 2 barazime, kur dihet se në Ligë të Konferencës fitorja shpërblen me 400 mijë euro, ndërsa barazimi me 133 mijë, atëherë kampionja e Kosovës tashmë ka të kaluar shifrën e 4 milionëve!
Sa për karakteristikë dhe për të parë rëndësinë dhe madhështinë e asaj që ka arritur Drita, si ilustrim: Rayo Vallecano është në pozitën e 12-të, Fiorentina në të 17-tën, Crystal Palace në të 18-tin vend në tabelën aktuale pas katër xhirosh në Ligë të Konferencës! Tabela e plotë.
