Pas publikimit të listës, Sylvinho: Nuk është momenti për të rinjtë

Nuk ka pasur ndonjë befasi në listën e Shqipërisë për ndeshjen miqësore dhe kualifikuese për Botërorin 2026 të muajit shtator.

FSHF ka publikuar listën e lojtarëve të ftuar, ndërsa tekniku brazilian i kuqezinjëve ndër të tjera ka thënë se nuk është momenti i duhur për të thirrë lojtarë të rinj në ekip.

Shqipëria është mysafire e Gjibraltarit më 4 shtator në ndeshjen miqësore, ndërsa pret Letoninë më 9 shtator të vlefshme për grupin kualifikues. Kuqezinjtë bëjnë pjesë në Grupin K kualifikues, ndërsa pas 4 ndeshjeve të para kanë vetëm një fitore, shoqëruar me 2 barazime dhe 1 disfatë.

Lider i pakontestueshëm i Grupit K për momentin është Anglia me 9 pikë nga 3 ndeshje, ndërkaq Shqipëria e dyta me 5 pikë nga 4 ndeshje. E treta është Serbia me 4 pikë nga 2 ndeshje, sa ka edhe Letonia por me tre ndeshje të luajtura. E fundit është Andorra me 0 pikë nga 4 ndeshje.

“Ndeshja me Letoninë? – Do të ketë ndryshime për ndeshjen me Letoninë, duke qenë që kemi dhe një ndeshje miqësore para. Kemi lojtarë si Adrian Bajrami, Medon Berisha dhe Pajaziti që kanë luajtur me Kombëtaren U-21, por ende nuk kanë luajtur 45 minuta me Kombëtaren A. Kemi sigurisht dhe shumë lojtarë të tjerë, rreth 20 që jemi pas tyre, por ende nuk ka ardhur momenti i duhur. 4-5 prej tyre janë shumë lojtarë të mirë që po i ndjekim, por ftesa do të vijë në kohën e duhur. Letonia është ekip i fortë, e dimë që është ndeshje e vështirë, e kemi parë ndeshjen e kaluar dhe mund të ketë ndryshime në këtë rast.

Për sa i përket Nedim Bajramit dhe Ernest Muçit, të dy kanë bërë një rrugëtim me Kombëtaren shqiptare dhe vijnë me kënaqësi. Nedim Bajrami bëri një rrugëtim në kualifikueset e Europianit të shkëlqyer, ndoshta nuk është në momentin e tij më të mirë. Muçi ka pasur një dëmtim të vogël, por dje luajti 45 minuta dhe kemi folur me të. Janë lojtarë që përgjigjen në fushë për Kombëtaren, kemi besim te këta dy lojtarë.” ka thënë Sylvinho ndër të tjera në konferencë për shtyp sot.

Lojtarët e ftuar:

PORTIERË: Strakosha, Kastrati, Dajsinani.

MBROJTËS: Mitaj, Aliji, Djimsiti, Ajeti, Bajrami, Kumbulla, Husaj, Balliu.

MESFUSHORË: Asllani, Laçi, Ramadani, Medon Berisha, Shehu, Pajaziti, Bajrami, Arbër Hoxha, Asani, Muçi.

SULMUES: Broja, Manaj, Uzuni, Daku.