Për herë të parë në karrierë, Lando Norris shpallet kampion i Botës në F1!

Fitore në garën e sotme të Abu Dhabit për Max Verstappenin, por kjo nuk i mjaftoi holandezit që ta mbrojë titullin kampion.

Ky titull për herë të parë shkon te Lando Norris, i cili sot përfundoi i treti, mjaftueshëm për t’u shpallur kampion i Formula 1. I dyti sot përfundoi Oscar Piastri.

Sezoni filloi me dominim të madh të McLarenit dhe dy shoferëve të kësaj skuadre, por dalëngadalë përmirësimi i makinës së Red Bullit në ndërkohë dhe cilësia individuale e Max Verstapennit bënë që gara për titullin kampion të ringjallej në pjesën e dytë të sezonit.

Në fund, Max Verstappen e çoi garën për titull deri në ditën e fundit, pra në garën e sotme. Sot në luftë për titullin ishin tre garues: Max Verstappen i Red Bullit dhe Oscar Piastri e Lando Norris nga McLareni. E në fund, Lando bëri atë që i mjaftonte, përfundoi në podium dhe kjo i mjaftoi që ta fitojë titullin e parë në karrierë.

Kështu, në renditjen përfundimtare të sezonit Lando Norris përfundon me 423 pikë, Max përfundon i dyti me 421 pikë kurse Oscar Piastri përfundon i treti me 410 pikë.

Padiskutueshëm, McLaren e ka fituar garën e skuadrave tash e sa kohë, ndërkohë ky ishte një tjetër sezon zhgënjyes për skuadrën e Ferrarit, skuadrën ikonë të Formula 1.

Sezonin tjetër, që fillon në mars të vitit të ardhshëm, për herë të parë do të kemi 11 skuadra garuese, pra 22 shoferë garues.