
FFK publikon ftesat, Avdullahu i përfshirë, Rashica mungon!
Ashtu sikurse paralajmëroi, FFK ka publikuar sot ftesat për ndeshjet tepër të rëndësishme të shtatorit për Kosovën. Selektori Franco Foda ka bërë përzgjedhjen e lojtarëve, ndërkaq vërehet edhe ftesa për risinë Leon Avdullahu, që së fundi la Zvicrën për të përfaqësuar Kosovën në nivel senior. Aty është edhe Veldin Hodza, që la grupmoshat e Kroacisë për t’u bërë pjesë e Kosovës. Ndërsa vërehet mungesa e parë e Milot Rashicës në një grumbullim. Në anën tjetër, edhe Bersant Celina që ka kapur një formë të mirë me AIK-un, nuk është ftuar.
Kosova do të ketë ndeshjet më të vëshira të Grupit B në shtator dhe do të jetë start i vështirë, pasi që udhëton për ndeshje ndaj Zvicrës dhe pret Suedinë. Biletat për këtë të fundit, veçse janë shitur të gjitha dhe “Fadil Vokrri” do të jetë përplotë.
Kosova do t’i nisë këto kualifikime me dy përballje. Fillimisht si mysafire kundër Zvicrës, më 5 shtator në Bazel dhe më pas në “Fadil Vokrri” kundër Suedisë. Dardanët synojnë të japin maksimumin në këto dy ballafaqime për të nisur mbarë këtë cikël kualifikues.
Stërvitjen e parë Kombëtarja e Kosovës do ta zhvillojë, të hënën, më 1 shtator, në orën 17:00 në Kampin Nacional në Hajvali. Paraprakisht, në orën 12:00, përzgjedhësi Foda do të paraqitet në konferencë për media.
Lista e të ftuarve nga Franco Foda
PORTIERË:
Arjanet Muric, Amir Saipi, Visar Bekaj.
MBROJTËS:
Mërgim Vojvoda, Florent Hadërgjonaj, Amir Rrahmani, Lumbardh Dellova, Ilir Krasniqi, Fidan Aliti, Leart Paçarada, Dion Gallapeni.
MESFUSHORË:
Elvis Rexhbeçaj, Valon Berisha, Veldin Hodza, Lindon Emërllahu, Leon Avdullahu, Ermal Krasniqi, Florian Haxha, Muharrem Jashari, Edon Zhegrova, Baton Zabërgja, Meriton Korenica, Florent Muslija.
SULMUES:
Vedat Muriqi, Albion Rrahmani, Fisnik Asllani.
Kosova bën pjesë në Grupin B të kualifikimeve për Kampionatin Botëror “USCAME 2026”, ndërsa pos Zvicrës dhe Suedisë në grup ka kundërshtar edhe Slloveninë. Vetëm vendi i parë i grupit siguron biletën direkte për Botëror, ndërkaq skuadra që përfundon e dyta, duhet të luftojë në tre ndeshje playoffi për të siguruar biletën.