Kosova mbyll Ligën e Kombeve me humbje të rëndë në Dublin

Një gabim në minutat e para dhe fund jo i mirë i kampanjës. Kosova humbi 3:0 ndaj Irlandës, duke mbetur në vendin e tretë në grupin e Ligës së Kombeve. Kartoni i kuq i Hajrizit prishi planet e lojës.

Mbrojtësi Kreshnik Hajrizi u bë protagonist negativ në ndeshjen vendimtare të zhvilluar të martën mbrëma në Dublin. Në minutën e 26-të, ai ndali topin me dorë në vijë të portës, duke shkaktuar penalltinë dhe duke u ndëshkuar me karton të kuq, pasi që portieri Aro Muric kishte dalë keq në krosim. Troy Parrott shënoi nga pika e bardhë (28’), duke i dhënë epërsinë Irlandës.

Megjithëse ‘Dardanët’ e nisën mirë ndeshjen përmes Emërllahut e Muriqit, ky moment e ndryshoi rrjedhën e lojës. Në pjesën e dytë, Irlanda thelloi epërsinë me një tjetër penallti të Parrott (50’) dhe një gol me kokë të Jack Moylan (75’).

Irlanda 3-0 Kosova

Çfarë thotë tabela?

Austria fitoi grupin (12 pikë) dhe ngjitet lart.

Irlanda e mbyll e dyta (8 pikë) dhe shkon në plejof për Ligën A, duke siguruar gjithashtu vazon e dytë për kualifikimet e Euro 2028.

Kosova mbetet e treta (6 pikë) dhe siguron qëndrimin në Ligën B, por bie në vazon e tretë për shortin e Euro 2028 që tërhiqet më 6 dhjetor.

Për më tepër, Kosova i shpëtoi rrezikut të rënies në vendin e katërt falë barazimit 1:1 mes Austrisë dhe Izraelit. Përzgjedhësi Franco Foda dhe skuadra mbyllin kështu një kampanjë sfiduese, ku objektivi minimal i mbetjes në Ligën B u arrit.

Si shkroi FFK?

Kombëtarja e Kosovës e ka mbyllur edicionin e pestë të Ligës së Kombeve, teksa pësoi humbje 3:0 nga Irlanda, në ndeshjen e zhvilluar të martën mbrëma në Dublin.

Momenti vendimtar i ndeshjes ndodhi në minutën e 26-të, kur Kreshnik Hajrizi ndali topin me dorë në vijën e portës, duke shkaktuar penallti dhe duke u ndëshkuar me karton të kuq. Nga pika e bardhë, Troy Parrott ishte i saktë në minutën e 28-të, duke i dhënë epërsinë Irlandës.

Pavarësisht disavantazhit numerik, Dardanët u përpoqën të qëndronin në lojë, por Irlanda e shfrytëzoi epërsinë e një lojtari më shumë. Në minutën e 50-të, pas një penalltie të shkaktuar nga portieri Aro Muric, Parrott realizoi sërish për 2:0.

Rezultatin përfundimtar 3:0 e vulosi Jack Moylan në minutën e 75-të, me një goditje të saktë me kokë.

Kosova e nisi ndeshjen me qasje sulmuese, duke krijuar rrezik përmes Lindon Emërllahut dhe Vedat Muriqit, por përjashtimi i Hajrizit ndryshoi rrjedhën e takimit.

Me këtë rezultat, Kosova e përfundon Grupin B3 në pozitën e tretë me gjashtë pikë dhe siguron qëndrimin në Ligën B edhe për edicionin e ardhshëm të Ligës së Kombeve.

Austria e fitoi grupin me 12 pikë, Irlanda përfundoi e dyta me tetë, Kosova e treta me gjashtë, ndërsa Izraeli i fundit me katër pikë.

Kosova do të jetë në vazon e tretë për shortin e kualifikimeve, i cili do të tërhiqet më 6 dhjetor.

Fillimi
Rezultatet
Tabela
Live