Qeveria e Kosovës: 1 milionë euro për kualifikim në Botëror!

Pas suksesit historik të ekipit A të Kosovës me sigurimin e playoffit për Botëror, Qeveria në detyrë e Republikës së Kosovës ka marrë Vendim për t’i shpërblyer ata.

Befasia e grupit

Kujtojmë, Kosova edhe pse ishte ekipi më i dobët në grup në letër dhe vinte prej vazos së katërt në Grupin B ku më e forta ishte Zvicra, pastaj Suedia e Sllovenia, ka arritur që të tejkalojë këta dy të fundit, duke përfundnuar në vend të dytë.

Kjo, po që ishte arritje historike për “dardanët” që po drejtohen suksesshëm nga gjermani Franco Foda. Por, për të arritur Botërorin “USCAME 2026” ekipi ka ende punë. Dhe atë të vështirë.

Së pari, duhet të kalojë Sllovakinë më 26 mars, e pastaj nëse arrihet kjo, “dardanët” në finale do të presin fituesin e duelit Turqia-Rumania në “Fadil Vokrri”.

Prej 250 mijë në 1 milion euro

Kështu, për arritjet e deritashme është miratuar buxheti prej 250 mijë eurosh nga shteti. Për kalimin e Sllovakisë, shifra rritet në 500 mijë euro. Kurse në rast të kualifikimit për Kampionat Botëror — që do të ishte mrekulli në vete — Republika e Kosovës do të shpërblejë ekipin A me 1 milionë euro.

Suksesi që ka arritur Kosova deri tani vlen shumë më shumë. Por, arritja në Botëror, do të ishte një histori në vete të cilën shumë shtete rrallë herë mund ta arrijnë.

Vështirësia dhe historia

Kujtojmë, Turqia që garon gati një shekull në këto gara dhe ka popullsi shumëfish më të madhe nuk ka marrë pjesë në Botërore që prej vitit 2002. Rumania, për herë të fundit pjesë e Botërorit ka qenë në vitin 1998. Ndërsa Sllovakia si shtet i pavarur ka marrë pjesë një herë, në vitin 2010.

Për Kosovën, si shtet i pranuar në UEFA e FIFA, kjo është vetëm hera e tretë që merr pjesë në kualifikime. Dhe suksesi i arritjes në Botëror do të ishte i pamatshëm në vlerë monetare, kur dihet ndikimi i jashtëzakonshëm që bën një Kampionat Botëror në futboll dhe popullaritetin e madh që ka sporti në fjalë.