HISTORIKE
Mbyllet Evropiani më i trofeshëm në histori për Kosovën
18 April, 2021 @19:18
Me dy medalje të arta, një të bronztë dhe dy vende të pesta, Kosova e ka mbyllur me sukses historik Kampionatin Evropian të xhudos që u mbajt gjatë këtyre tri ditëve në Lisbonë të Portugalisë.
Kosova si një shtet i vogël në këtë garë, mori pjesë me vetëm 6 garues, që ishte numër trefish më i vogël se i shteteve si Rusia, Portugalia, Gjermania, Spanja dhe Franca, të cilët kishin nga 18 garues.
Po ashtu edhe shumë shtete të tjera kishin numër më të madh të garuesve se sa Kosova, që saktësisht ishin 21 shtete me së paku 8 garues.
Por këto numra nuk e penguan ekipin e Kosovës të udhëhequr nga Driton Kuka të ngjitet në maje të Evropianit.
Së pari Distria Krasniqi e fitoi medaljen e artë në kategorinë deri në 48 kg, e cila u shpall kampione e Evropës për herë të parë në karrierën e saj.
Më pas me medalje u stolis edhe Nora Gjakova, e cila e fitoi medaljen e bronztë në kategorinë deri në 57 kg. Në këtë kategori mori pjesë edhe Flaka Loxha, e cila ishte e pafat në short pasi që u mposht që në ndeshjen e parë nga xhudistja sllovene Kaja Kajzer, që ishte finaliste e kësaj gare.
Shumë afër medaljes ishin edhe Laura Fazliu (-63kg) dhe Loriana Kuka (-78kg) që përfunduan në pozitat e pesta dhe medalja e bronztë u iku për pak.
Treshen e medaljeve e kompletoi garuesi i vetëm në konkurrencën e meshkujve, Akil Gjakova, i cili u shpall kampion i Evropës në kategorinë deri në 73 kg dhe e fitoi medaljen e parë historike të Kosovës në një garë të nivelit të tillë tek meshkujt.
Akili me këtë sukses theu akullin duke u u bërë kampioni i parë dhe i vetëm Evropian në sporte Olimpike në historinë e sportit tonë.
