VOLEJBOLL
Humbja e dytë vjen nga Sllovakia
8 May, 2021 @18:16
Pas humbjes në ndeshjen e parë ndaj Malit të Zi, Kosova ka pësuar humbje edhe në ndeshjen e saj të dytë.
Sllovakia, e llogaritur si favorite e Grupit D, e ka fituar ndeshjen ndaj Kosovës me rezultat 3-0.
Sllovaket që vinin nga fitorja ndaj Finlandës, kanë regjistruar edhe triumfin e dytë në fazën e parë të CEV EuroVolley kualifikimeve.
Kosova nuk e nisi ndeshjen ashtu si pritej, duke u kufizuar në setin e parë në vetëm 14 pikë.
Megjithatë “Dardanet” e përmirësuan paraqitjen e tyre menjëherë në setin e dytë, në të cilin rezistuan deri në 15:14, duke mos e lejuar ekipin sllovak të shkëputej në rezultat.
Nga ky moment, Kosova ngeci duke lejuar një seri të ekipit kundërshtar që u shkëput në 22:17, e pastaj edhe 25:17.
Setin e tretë, prapë rivalitet i hershëm deri te 3 me 2 në favor të sllovakeve, për të vazhduar në 8:3, në të cilin moment Lorik Ilazi reagon me time-out, për të rikthyer vetëbesimin e ekipit.
Megjithatë asgjë nuk ndryshoi në vazhdim, meqë Sllovakia vazhdon serinë prej 10:2, për rezultatin 13:5, gjatë së cilit Ilazi shfrytëzon edhe time-outin e fundit në këtë set.
Sllovakia deri në fund dëshmoi pritjet si ekipi favorit për vendin e parë në grup dhe me meritë triumfoi, 25 me 16, për ta mbyllur ndeshjen 3 me 0.
Kosova e zhvillon ndeshjen e fundit, të dielën ndaj Finlandës, duke filluar nga ora 17:00 në Pallatin e Sporteve “Verde” në Podgoricë.
