NGJITJE SPORTIVE
Kampionët e parë të ngjitjes sportive në Kosovë
12 December, 2021 @0:17
Gara e parë e ngjitjes sportive është mbajtur të shtunën në Pejë, që ka nxjerrë edhe kampionët e parë të këtij sporti në Kosovë.
Organizuar nga FBAK në këtë garë morrën pjesë 12 garues, prej të cilëve tetë te meshkujt e katër te femrat. Vetëm tre klube kanë marrë pjesë në këtë garë sivjet, Marimangat e Pejës, Gjeravica e Pejës dhe TEK nga Mitrovica, në të dyja gjinitë.
Pas garave që u mbajtën në tri raunde në kategorinë e femrave kampione u bë Lisa Çitaku, ndërsa vendin e dytë dhe të tretë e zunë Lirika Raça e Albana Berisha, përkatësisht.
Te meshkujt, Albi Koçani ishte më i miri ndërsa pas tij u renditën Alb Berisha dhe Tahir Ibrahimi.
Për shkak të infrastrukturës, gara u mbajt vetëm në disiplinën Bouldering.
“Kjo garë është organizuar nga Komisioni i Ngjitjes Sportive, i cili funksionon në kuadër të Federatës Bjeshkatare dhe Alpiniste të Kosovës. Suksese të gjithë garuesve!” - shkruajti FBAK të shtunën, në atë që sinjalizoi fillimin e garës.
Në anën tjetër FBAK gjithashtu ka bërë të ditur se që nga viti i kaluar (2020) ngjitja sportive është kategori e sporteve Olimpike dhe kjo shihet si mundësi e mirë për ngjitësit kosovarë që të marrin pjesë edhe në garat ndërkombëtare.
