VOLEJBOLL | FINALJA E KUPËS
KV Peja duke festuar trofenu e fituar në Final Four të Kupës së Kosovës/ Foto: FVK
Peja fiton Kupën e Kosovës, në konkurrencën e meshkujve
17 April, 2022 @23:39
Peja ka mposhtur Ferizajn në finale me rezultat 3-1 (25-22, 18-25, 25-22, 28-26), për t’u shpallur fituese e Kupës për vitin 2022.
Pejanët fituan setin e parë me rezultat të ngushtë, teksa ferizajasit u përballën me lëndimin e pranuesit, Samuel Amorim, i cili nuk ishte i gatshëm të vazhdonte ndeshjen pas dëmtimit.
Në setin e dytë, Ferizaj u rikthye duke fituar me rezultat 18-25, por fatkeqësisht u përball me një tjetër lëndim - me korrektorin Olavo Veiga që e pësoi dhe, po ashtu, nuk arriti ta vazhdojë ndeshjen.
Peja, në anën tjetër, shfrytëzoi epërsinë numerike në bankën rezervë, duke fituar dy setet e radhës për t’u shpallur eventualisht kampion i Kupës së Kosovës.
Medaljet u ndanë nga drejtuesit e Federatës së Volejbollit të Kosovës (FVK), derisa pejanët festuan triumfin e merituar. MVP i finales u shpall Bardhyl Hajdaraj.
