SKITARI
Albin Tahiri fiton normën olimpike edhe në disiplinën e sllallomit
8 March, 2021 @16:09
Skitari kosovar, Albin Tahiri, pas normës olimpike në disiplinën e sllallomit të madh, ka arritur të fitojë edhe normën olimpike në disiplinën e sllallomit të skijimit alpin për Lojërat Olimpike Dimërore Pekini 2022.
Tahiri fitoi normën falë rezultatit të sotëm të arritur në garën e Rogllas së Sllovenisë.
Ai doli i 40-ti me kohë 1:36.17 minuta pas dy lëshimeve, ndërsa fitoi 123.19 pikë të Federatës Ndërkombëtare të Skitarisë, që ishin të mjaftueshme për të kompletuar rezultatet e nevojshme për normë olimpike. Pjesëmarrës në garë ishin 79 garues, ku 35 nuk e përfunduan njërin nga dy lëshimet.
Tahiri tani do të synojë të arrijë suksesin e njëjtë edhe në disiplinat e shpejta si super sllallom të madh, kombinim alpin dhe lëshim.
Në sllallom normën olimpike e ka të fituar edhe skitari tjetër kosovar, Arbi Pupovci.
