Hendboll, ndërrohet sistemi i garave

Federata e Hendbollit të Kosovës, stinorin e ardhshëm do të zbatojë sistemin e garave me Play-Off, pas përfundimit të stinorit të rregullt dhe do të shtojë ekipet në Superligë. 

Kështu ka vendosur FHK, pasi që ka konstatuar se garat e këtij stinori nuk kanë sjellur efekt të dëshiruar dhe popullarizim të sportit. 

Këtë stinor, kanë garuar tetë skuadra në Superligë, duke u takuar me njëra tjetrën katër herë gjatë gjithë stinorit, derisa ekipi që është në vend të parë shpallet kampion. 

Besa ka aktualisht 51 pikë, derisa vendi i dytë Prishtina, 38, që ka bërë të ditur kampionin heret. 

E prej stinorit tjetër, do të jenë 10 ekipe në Superligë, do të ndeshen dy herë me njëra-tjetrën gjatë gjithë stinorit dhe pastaj do të pasojë Play-Offi, që do të nxjerrë finalistët dhe kampionin, ka bërë të ditur FHK-ja. 

Pjesa e poshtme e tabelës do të përcaktojë ekipet e Play-Outit, prej vendit 7-10. 

Tre skuadrat më të mira të Play-Offit do të sigurojnë daljen në garat europiane.