HENDBOLL
Besa Famiglia shpallet kampione
30 May, 2015 @11:58
Skuadra pejane, Besa Famiglia, ka arritur ta mbrojë titullin e kampionit, të cilin e kishte fituar edhe në vitin e kaluar.
Pas ndeshjes së javës së fundit kundër Drenicës, të cilën e fituan me rezultat 44-35, Besa Famiglia ka përfunduar stinorin në krye të radhitjes tabelare me 55 pikë. Në të vërtetë pejanët javë më parë kanë siguruar titullin e kampionit, ndërsa ndeshjet e fundit i zhvillonin vetëm formalisht.
Ky është titulli i 13-të i fituar në histori të klubit (dy herët e para me emrin e mëparshëm Buduçnosti), që e bën ate skuadra me më së shumti tituj të fituar në Kosovë.
Sot dhe nesër do të luhen edhe ndeshjet tjera të mbetura të javës së fundit në Superligë.
