CHALLENGE CUP, RAUNDI I TRETË KUALIFIKUES

Fotografi e përbashkët e Çelikut dhe Prishtinës para ndeshjes.

Një gol eliminoi Prishtinën

29 November, 2015 @20:48

Prishtina është mposhtur sot nga Çeliku në Zenicë të Bosnjes e Hercegovinës me rezultat 23-21, për t’u eliminuar nga garat e mëtutjeshme të Challenge Cup.

Ekipi boshnjak ka fituar me dy gola epërsi këtë ndeshje, derisa Prishtina kishte fituar dje me një gol epërsi dhe me rezultat të përgjithshëm 51-50 ekipi boshnjak vazhdon garat në Europë.

Në ndeshjen e sontme, hendbollisti më efikas i Prishtinës ka qenë Florim Hoxha me 7 gola të shënuar, derisa Oltion Beshiri ka shënuar 5 të tjera, derisa u dallua edhe portieri Edon Gashi me 13 intervenime në portën bardhekaltër.

Te ekipi fitues, Edin Bajramovic dhe Aldin Begacic kanë shënuar nga 6, derisa Mirza Dervencic e Dervish Birdahic nga 3.

Në deklaratën e tij pas ndeshjes, trajneri i Prishtinës, Taib Kabashi, ka thënë se, “arsyeja kryesore e humbjes së ekipit ka qenë lodhja nga rruga e stërgjatur deri në Zenicë, ndërsa vendasve i ka uruar suksese në vazhdim të garave.”

Në anën tjetër, trajneri i Çelikut, Senad Skopljak, ka thënë se, “Prishtina i ka befasuar me cilësinë dhe tek sot kanë kuptuar që mbi 6 lojtarë të ekipit bardhekaltër janë pjesë e reprezentacionit të Kosovës, që tregon cilësinë e tyre.”

Video

FAKTE:

Prishtina në marrëveshje me Çelikun ka pranuar që të dyja ndeshjet e raundit të tretë kualifikues në Challenge Cup t'i zhvillojë në Bosnje për shkak të arsyeve financiare.
Prishtina dje luajti si vendas dhe fitoi 29-28. Ndërsa sot ishte mysafire ku u mposht 23-21. Me rezultat të përgjithshëm 51-50, Çeliku shkon tutje.
Prishtina ka udhëtuar mbi një ditë pa u ndalë për në Zenicë, pasi që së pari janë kthyer nga doganierët serb për të vazhduar hyrjen në Bosnje nga kufiri malazez.